Matthew 9

Yesus na tamo jejamu laiyej qaji di boletej

1Onaqa Yesus aqa aŋgro ti naŋgi olo qobuŋ gogetosibqa ya agu taqal beiq olo aieb. Aisib Yesus aqa segi qureq di branteb. 2Brantosib sonabqa tamo qudei naŋgi na tamo bei jejamu laiyej qaji a saperaq di atsib Yesus aqa areq osi beb. Onaqa Yesus a tamo naŋgi di naŋgo areqalo unej naŋgo areqalo qujai Yesus na tamo di boletqa kere. Degsi unsiq deqa tamo jejamu laiyej qaji di minjej, “O ijo aŋgro, ni areboleimeme. Ino une kalil e na kobotetmonum.”

3Onaqa dal anjam qalie tamo qudei warum dia awesoqneb qaji naŋgi Yesus aqa anjam di qusibqa naŋgi segi segi maroqneb, “Yesus a Qotei misiliŋyqo.”

4Naŋgi degsib mareqnabqa Yesus a naŋgo areqalo di qalieosiqa minjrej, “Niŋgi kiyaqa areqalo uge di onub? 5Anjam kie e na tamo jejamu laiyqo qaji di minjqajqa wau koba sai? ‘Ino une kalil e na kobotetmonum,’ anjam de kio, ‘Ni tigelosim walwel,’ anjam de kio? 6Ariya e Tamo Aŋgro e mandamq endia siŋgila ti unum deqa e na tamo naŋgo une kobotetnjrqa kere. Niŋgi degsib qalieqajqa deqa e na tamo di boletqai.” Yesus a na naŋgi degsi minjrsiqa tamo jejamu laiyej qaji di koqyosiqa minjej, “Ni tigelosim ino sapera osim ino talq gile.” 7Degsi minjnaqa aqa jejamu boleonaqa a tigelosiqa aqa talq gilej. 8Onaqa tamo uŋgasari kalil naŋgi Yesus aqa siŋgila di unsibqa naŋgi tulaŋ ulaosib Qotei aqa ñam soqteb. Di kiyaqa? Qotei na siŋgila kobaquja Yesus yej deqa.

Yesus na Matyu minjej, “Ni e daurbe.”

9Onaqa Yesus a dena walwelosiqa takis o qaji tamo bei aqa ñam Matyu a takis o qaji talq di awesonaq gilsiq itej. Osiqa minjej, “Ni e daurbe.” Degsi minjnaqa a tigelosiqa Yesus dauryej.

10Onaqa Yesus aqa aŋgro naŋgi ti Matyu aqa talq gilsib awoosib iŋgi uyoqneb. Naŋgi segi sai. Takis o qaji tamo ti une tamo ti tulaŋ gargekoba naŋgi dego bosib awoosib Yesus aqa aŋgro naŋgi ti iŋgi uyoqneb. 11Onaqa Farisi tamo qudei naŋgi bosib Yesus a takis o qaji tamo ti une tamo ti naŋgi koba na iŋgi uyeqnab unjrsibqa Yesus aqa aŋgro naŋgi nenemnjreb, “Nuŋgo Tamo Koba a kiyaqa takis o qaji tamo ti une tamo ti naŋgi koba na awoosib iŋgi uyeqnub?”

12Onaqa Yesus a Farisi naŋgo anjam di qusiqa minjrej, “Tamo ma saiqoji naŋgi ma gereiyo tamo aqaq gilosaieqnub. Tamo ma ti naŋgi segi ma gereiyo tamo aqaq gileqnub. 13Qotei aqa anjam bei nami neŋgreŋyeb qaji di niŋgi sisiyoiye. Agi nami endegsib neŋgreŋyeb, ‘Niŋgi e laŋa atraibeqnub. E nuŋgo kumbra deqa arearetbosai. Ariya niŋgi na tamo naŋgi kumbra bole bole enjroqniye. Yimqa e nuŋgo kumbra deqa tulaŋ arearetbqas.’ Niŋgi anjam di sisiyosib geregere poiŋgem.” Osiqa Yesus a olo anjam endegsi minjrej, “Tamo bei a marqas, ‘E tamo bole. E une saiqoji.’ E tamo deqaji naŋgi metnjrit ijoq bqajqa e deqa bosai. Tamo a marqas, ‘E une ti.’ E tamo deqaji naŋgi metnjrit ijoq bqajqa e deqa bem.”

Yesus aqa aŋgro naŋgi kiyaqa qurieŋosaieqnub?

14Bati bei Jon aqa aŋgro naŋgi Yesus aqa areq bosib minjeb, “Iga ti Farisi naŋgi ti iŋgi uratoqnsim qurieŋeqnum. Kiyaqa ino aŋgro naŋgi qurieŋosaieqnub?”

15Onaqa Yesus na kamba minjrej, “Tamo bei a uŋa baŋ ojqa bati qa a aqa was naŋgi ti soqnimqa naŋgi are gulubeinjrqas e? Sai. Ariya bunuqna naŋgo was yainjribqa bati deqa naŋgi are gulubeinjrimqa qurieŋosib sqab.

16“Tamo bei a gara jugo bunuj osim dena mutu gentosim gara jugo sari braŋoq di qandimqa keresai. Degsi qandimqas di bunuqna a na gara jugo sari di yansimqa gara mutu bunuj a kiñalaosim gara jugo sari di uratim braŋ qelikobaqas. 17Tamo bei a wain bunuj osim ya nobu kaja aqa jegara na gereiyo qaji sariq di qamqa keresai. Ya nobu sari di nami kaŋgraŋosiq siŋgilaej. Deqa a wain bunuj qamimqa wain a didiqosim ya nobu sari paratosimqa wain bileŋosim mandamq aiqas. Ya nobu a dego ugeqas. A wain bunuj osim ya nobu bunujq di qamqas di naŋgi ombla bole sqab.”

Yesus na aŋgro moiej qaji olo tigeltej. A na uŋa aqa gara mutu ojej qaji di dego boletej

18Yesus a na Jon aqa aŋgro naŋgi yawo anjam degsi minjrsiq koboonaqa a ŋam atej Qotei tal taqato tamo bei a walwelosiq Yesus aqa areq bosiqa siŋga pulutosiqa minjej, “O Tamo Koba, ijo aŋgro sebiŋ a endego moiqo. Deqa ni bosim ino baŋ aqa jejamuq di atimqa a olo tigelosim ŋambile sqas.” 19Onaqa Yesus na tamo di odyosiqa tigelosiq a dauryosiq gileqnaqa aqa aŋgro naŋgi dego tigelosib naŋgi aiyel daurnjrsib gileb.

20Naŋgi gileqnabqa uŋa bei ma ti soqnej qaji a Yesus aqa qoreq na dadauryosiqa baŋ waiysiq Yesus aqa gara mutu ojej. Uŋa di a nami bai na unej leŋ aioqnsiq degsi soqnej wausau 12-pela uratej. 21A endegsi are qalej, “E Yesus aqa gara mutu segi baŋ na ojitqa ijo ma koboqas.” Degsi are qalsiqa baŋ waiysiq Yesus aqa gara mutu ojej. 22Ojnaqa Yesus a bulosiqa uŋa di unsiqa minjej, “O ijo aŋgro, ni are lawo soqnime. Ni ino areqalo e qa siŋgilatosim ijoq bonum deqa ino ma agi koboqo.” Onaqa bati qujai deqa aqa leŋ aioqnej qaji di koboej.

23A uŋa degsi minjsiq walwelosiq Qotei tal taqato tamo aqa talq di brantosiqa ŋam atej tamo uŋgasari naŋgi yumba anjamoqnsib akam murqumyeqnab unjrej. 24Unjrsiqa minjrej, “Niŋgi sasaloiye. Aŋgro sebiŋ di a moiosai. A laŋa ŋeisiq qambumtejunu.” Degsi minjrnaqa naŋgi Yesus kikiyeb. 25Ariya tamo uŋgasari naŋgi di sasalosib tal uratonabqa Yesus a aŋgro moiej qaji aqa warum miligiq gilsiqa aŋgro aqa baŋ ojsiq soqtonaqa a olo ŋambile osiq tigelosiq awoej. 26Onaqa naŋgi jaraiosib sawa sawa kalilq dia Yesus aqa kumbra deqa saoqnsib laqneb.

Yesus a na tamo aiyel ŋamdamu geteŋnjro qaji naŋgi ti tamo medabu geteŋyej qaji ti boletnjrej

27Onaqa Yesus a qure di uratosiq a olo walwelosiq gileqnaqa tamo aiyel ŋamdamu geteŋnjro qaji naŋgi gam na Yesus dauryosib giloqneb. Naŋgi giloqnsib leleŋoqnsib Yesus minjoqneb, “O Devit aqa Ŋiri, ni iga qa are ugeimeme.” 28Degsib Yesus minjeqnabqa a tal bei gogetej. Tal gogetosiq sonaqa naŋgi aiyel Yesus aqa areq bonabqa minjrej, “E na niŋgi boletŋgwa kere niŋgi degsib are qalonub e?” Onaqa naŋgi na minjeb, “Od, Tamo Koba. Iga are qalonum, ni na aqo aiyel boletgwa kere.” 29Onaqa Yesus na minjrej, “Niŋgi e qa nuŋgo areqalo siŋgilatosib ijoq bonub deqa e niŋgi boletŋgwai.” Degsi minjrsiqa aqa baŋ waiysiq naŋgo ŋamdamu ojej. 30Ojnaqa naŋgo ŋamdamu poinjrnaqa naŋgi sawa uneb. Onaqa Yesus a siŋgila na minjrej, “Nuŋgo ŋamdamu boleqo deqa niŋgi tamo qudei naŋgi minjraib.” 31Ariya naŋgi Yesus aqa anjam di dauryosai. Yesus a naŋgi aiyel boletnjrej deqa naŋgi gilsib mare mare laqnab sawa deqaji tamo uŋgasari kalil naŋgi quekriteb.

32Naŋgi aiyel gileqnabqa tamo bei mondor uge na ojnaq medabu geteŋyej qaji a tamo qudei naŋgi na osib Yesus aqa areq osi beb. 33Osi bonabqa Yesus na mondor uge di wiyetonaqa aqa meŋ otyonaqa medabu waqtosiqa anjam maroqnej. Onaqa tamo uŋgasari kalil naŋgi Yesus aqa maŋwa di unsibqa naŋgi are koba qaloqnsib maroqneb, “Israel sawaq endia tamo bei na kumbra deqaji bei yeqnaq iga nami unosaioqnem.” 34Onaqa Farisi naŋgi Yesus aqa maŋwa di unsib maroqneb, “Mondor uge naŋgo gate koba Satan a Yesus aqa jejamuq di unu. Deqa siŋgila dena Yesus na mondor uge naŋgi winjreqnu.”

Yesus a tamo uŋgasari naŋgi qa are ugeiyej

35Ariya Yesus a dena walwelosiqa qure kokba ti qure kiñilala ti dia brantoqnsiqa Juda naŋgo Qotei tal miligiq giloqnsiqa Qotei aqa anjam palontosiq minjroqnej. Qotei a tamo uŋgasari naŋgo Mandor Koba sosiq naŋgi taqatnjreqnu. Anjam bole di Yesus na palontosiq minjroqnej. Osiqa tamo ma utru segi segi naŋgi boletnjroqnej. 36Tamo uŋgasari tulaŋ gargekoba naŋgi Yesus aqa areq beleŋeqnabqa a naŋgi unjrsiqa a naŋgi qa are ugeiyej. Di kiyaqa? Naŋgi tulaŋ so ugetesoqneb. Naŋgi kaja bul mandor saiqoji. 37Deqa a na aqa aŋgro naŋgi yawo anjam bei endegsi minjrej, “Wauq dia iŋgi gargekoba melionub. Ariya iŋgi meli bunuj otorqajqa wau tamo koba sai. 38Deqa niŋgi wau lanja minjibqa a na wau tamo qudei naŋgi eleŋosim qariŋnjrimqa naŋgi aqa wauq gilsib iŋgi meli bunuj otoreleŋqab.”